Como complemento da mostra fotográfica de Xosé Reigosa Entre Marbella e Torremolinos. [Imaxes de manicomio], este xoves, 16 de febreiro, ás 20:00 horas, terá lugar na Sala de Exposicións do Pazo de San Marcos unha conferencia do doutor Victor Rodríguez Pérez, do Servizo de Psiquiatría do HULA (Hospital Lucus Augusti), no que se encarga da sección de Psicoxeriatría, sobre o tema “A historia da psiquiatría.” A entrada a este acto é libre e gratuíta. + info sobre a exposición
+ info sobre Victor Rodríguez Pérez

Os museos da Rede Museística dependente da área de Cultura e Turismo da Deputación de Lugo foron seleccionados en representación de Galicia para participar no proxecto Quen lle dá a volta á tortilla. Homes, mulleres, xénero e roles nas coleccións de tres museos provinciais, unha iniciativa na que participan o Museo de Bellas Artes de Murcia (MuBAM) e o Museo de León. Neste proxecto, xestionado polo colectivo Medusa Mediación e subvencionado polo Ministerio de Cultura, interveñen como representantes dos respectivos museos Luís Grau (director do Museo de León), Juan Sandoval (director do Museo de Murcia) e Encarna Lago (xerente da Rede Museística de Lugo). Convócanse obradoiros e prepárase unha exposición itinerante coas creacións dos asistentes e d@s artistas invitad@s, entre eles @s galeg@s Noa Persán, Paula Cabaleiro e Iago Eireos. +info, formulario de inscrición no obradoiro e outros detalles do proxecto

O próximo sábado, 4 de febreiro de 2012, entre as 12:00 e as 14:00 h., na mesma Sala de Exposicións Pazo de San Marcos (sede da Deputación), vai ter lugar un obradoiro impartido polo fotógrafo Xosé Reigosa con motivo da exposición Entre Marbella e Torremolinos (Imaxes de manicomio). Convócase especialmente a familias (adultos con nenos/as) e é imprescindible a inscrición previa no Departamento de Didáctida do MPLugo. + info sobre a exposición
+ info sobre o obradoiro

A directora do MPLugo, Aurelia Balseiro, imparte unha conferencia solicitada pola comunidade educativa do IES Perdouro de Burela, este martes, 31 de xaneiro de 2012, ás 11:30 h., baixo o título “O Museo Provincial de Lugo e a conservación do patrimonio”.

O xoves 2 de febreiro de 2012, ás 20:00 h., vai ter lugar na Sala de Exposicións Pazo de San Marcos (sede da Deputación de Lugo) a conferencia impartida polo doutor Luis Vila Pillado sobre o tema A loucura no cine. Esta conferencia forma parte das actividades complementarias da exposición Entre Marbella e Torremolinos (Imaxes de manicomio), de Xosé Reigosa. A entrada é libre e gratuíta. + info sobre a exposición
+ info sobre o doutor Vila Pillado

VISITA TÉCNICA: Este mércores, 25 de xaneiro, ás 19:00 h., está programada unha visita técnica a cargo do directora do MPLugo, Aurelia Balseiro, para achegar a quen o desexe á obra do escultor cambadés ques e amosa ata o 2 de febreiro no MPLugo. A entrada é libre e gratuíta. PROXECCIÓNS: Así mesmo, comunícase que continúan as proxeccións (pases: 17:30 e 19:30 h. ) do vídeo “Asorey”, elaborado polo Taller Lumiére do IES Francisco Asorey de Cambados. Neste vídeo, dirixido por Jesús Barco, Fernando Tomé e Santiago Rey, interveñen Manolo Paz e Isaac Díaz Pardo, entre outros. Mereceu o primeiro premio no XXXIX Certame internacional audiovisual do Liceo Casino de Vilagarcía, modalidade de documental. Lembramos que a exposición vai estar aberta ao público no Refectorio do MPLugo ata o 2 de febreiro. + info sobre a exposición no MPLugo

Entre as actividades programadas arredor da exposición “Entre Marbella e Torremolinos [imaxes de manicomio]”, de Xosé Reigosa (Sala de Exposicións do Pazo de San Marcos), coa colaboración do Clube Cultural Valle-Inclán, este xoves, 26 de xaneiro, ás 20:00 h. proxéctase a película "LT22 Radio La Colifata" un documental que amosa un proxecto pioneiro do Hospital Psquiátrico Borda (Bos Aires) ao crear unha emisora para que os enfermos mentais puidesen expresarse libremente e mantivesen o contacto coa sociedade, unha especia de terapia social. A proxección vai ter lugar no Salón de Actos da Deputación e a entrada é libre e gratuíta. + info sobre LT22 Radio La Colifata
+ info sobre a exposición